കൊച്ചി: കൊച്ചിയില് മംഗളവനത്തില് അജ്ഞാത മൃതദേഹം. സിഎംആര്എഫ്ഐ ഓഫീസിന് മുന്വശത്തുള്ള ഗേറ്റില് കോര്ത്ത നിലയിലാണ് മധ്യവയസ്കന്റെ നഗ്ന മൃതദേഹം കണ്ടെത്തിയത്.Unidentified dead body in Mangalavanam in Kochi
ഇന്ന് രാവിലെ മംഗളവനം ജീവനക്കാരാണ് മൃതദേഹം കണ്ടത്. തുടര്ന്ന് പൊലീസില് വിവരം അറിയിക്കുകയായിരുന്നു. പൊലീസ് സ്ഥലത്തെത്തി പരിശോധന നടത്തി. അസ്വാഭാവിക മരണത്തിന് പൊലീസ് കേസെടുത്തു. മരിച്ചത് തമിഴ്നാട് സ്വദേശിയെന്നാണ് പൊലീസ് നല്കുന്ന വിവരം.
പ്രദേശത്ത് അലഞ്ഞുതിരിഞ്ഞ് നടക്കുന്ന ഇയാള് സ്ഥിരം പ്രശ്നക്കാരനാണെന്ന് പൊലീസ് പറയുന്നു. മദ്യപിച്ച് ഗേറ്റ് ചാടി കടക്കാനുള്ള ശ്രമത്തിനിടെ കമ്പി കുത്തി കയറി മരിച്ചതാകാനാണ് സാധ്യത. ഇയാള് ധരിച്ചിരുന്ന പാന്റ്സ് സമീപത്തുനിന്ന് കണ്ടെത്തിയെന്നും പൊലീസ് പറഞ്ഞു. ഇന്ക്വസ്റ്റ് നടപടികള്ക്ക് ശേഷം മൃതദേഹം പോസ്റ്റ്മോര്ട്ടം നടപടികള്ക്ക് അയക്കും.
ഹൈക്കോടതിയുടെ സമീപമാണെങ്കിലും മംഗള വനത്തിന്റെ വിജനമായ സ്ഥലത്താണ് മൃതദേഹം കണ്ടെത്തിയത്. സ്ഥലത്ത് സിസിടിവി ഉള്പ്പെടെ ഇല്ല. രാത്രിയിൽ ആളുകളെ ഇവിടേക്ക് കയറ്റാറില്ല. ദുരൂഹ മരണത്തിന് കേസെടുത്തിട്ടുണ്ടെന്നും കൂടുതൽ അന്വേഷണം നടക്കുകയാണെന്നും കൊച്ചി ഡിസിപി കെഎസ് സുദര്ശൻ പറഞ്ഞു.
മംഗളവനം പക്ഷി സങ്കേതത്തിലെ സംരക്ഷിത മേഖലയിലാണ് സംഭവം. രാവിലെ ആളുകള് നടക്കാനിറങ്ങുന്ന സ്ഥലത്തിന് സമീപമാണ് മൃതദേഹം കണ്ടെത്തിയത്. മംഗളവനത്തിൽ രാവിലെ നിരവധി പേരാണ് നടക്കാനെത്താറുള്ളത്. സുരക്ഷാമേഖലയിൽ ഇത്തരമൊരു സംഭവം നടന്നത് പൊലീസ് ഗൗരവമായിട്ടാണ് കാണുന്നത്.
