ഡൽഹി: വീടിനുള്ളിൽ മാതാപിതാക്കളും മകളും കൊല്ലപ്പെട്ട സംഭവത്തിൽ കൊലയാളി മകൻ തന്നെയെന്ന് പോലീസ്. കേസില് പ്രതിയായ മകനെ പോലീസ് അറസ്റ്റ് ചെയ്തു. സൗത്ത് ഡല്ഹിയിലെ നെബ്സരായിയില് താമസിക്കുന്ന രാജേഷ് കുമാര്(51), ഭാര്യ കോമള്(46), മകള് കവിത(23) എന്നിവരെയാണ് വീട്ടില് കുത്തേറ്റ് മരിച്ചനിലയില് കണ്ടെത്തിയത്. രാജേഷിന്റെയും കോമളിന്റെയും 27-ാം വിവാഹവാര്ഷികദിനമായ ബുധനാഴ്ച രാവിലെയായിരുന്നു സംഭവം.south delhi family murder case accused son arrested by police.
സംഭവം കൊലപാതകമാണെന്ന് പ്രാഥമിക പരിശോധനയില് വ്യക്തമായിരുന്നു. അതേസമയം, സംഭവസമയത്ത് താന് വീട്ടിലുണ്ടായിരുന്നില്ലെന്നാണ് ദമ്പതിമാരുടെ മകന് അര്ജുന് പോലീസിനോട് പറഞ്ഞിരുന്നത്.
താൻ പുലർച്ചെ പ്രഭാത സവാരിക്ക് പോയ ശേഷം തിരിച്ചെത്തിയപ്പോഴാണ് മൃതദേഹങ്ങൾ കണ്ടതെന്നാണ് അർജുൻ പൊലീസിനോട് പറഞ്ഞത്.
പൊലീസ് സമീപത്തെ സിസിടിവി ദൃശ്യങ്ങൾ അരിച്ചുപെറുക്കിയെങ്കിലും ആരും പുലർച്ചെ വീട്ടിൽ എത്തിയതായി കണ്ടെത്താനായില്ല. ഫോറൻസിക് വിദഗ്ധർ, ക്രൈം ടീം, സ്നിഫർ ഡോഗ് എന്നിവരെ സംഭവ സ്ഥലത്തേക്ക് എത്തിച്ച് പോലീസ് അന്വേഷണം ആരംഭിച്ചു. വീട്ടിൽ ആരെങ്കിലും അതിക്രമിച്ചു കടന്നതിന്റെയോ മോഷണം നടന്നതിന്റെയോ തെളിവ് ലഭിച്ചില്ല.
തുടർന്നാണ് പൊലീസ് അർജുനെ വിശദമായി ചോദ്യംചെയ്തത്. അർജുൻ കുറ്റം സമ്മതിച്ചെന്ന് പൊലീസ് പറയുന്നു. തന്റെ സഹോദരിയോടാണ് മാതാപിതാക്കൾക്ക് കൂടുതൽ ഇഷ്ടമെന്നും സ്വത്തുക്കളെല്ലാം അവൾക്ക് നൽകാൻ അവർ തീരുമാനിച്ചെന്നും അതിനാലാണ് താൻ കൊലപാതകം നടത്തിയതെന്നും അർജുൻ പറഞ്ഞു. കൂടാതെ മാതാപിതാക്കൾ തന്നെ മറ്റുള്ളവരുടെ മുന്നിൽ വച്ച് അധിക്ഷേപിക്കാറുണ്ടായിരുന്നുവെന്നും അർജുൻ പറഞ്ഞു. ഉറങ്ങുന്നതിനിടെ കത്തി ഉപയോഗിച്ച് മൂവരെയും കൊലപ്പെടുത്തിയ ശേഷം താൻ നടക്കാൻ പോയെന്നും അർജുൻ മൊഴി നൽകി.
