പാടുകള്‍ ഒന്നും ഇല്ലാത്ത തിളക്കമാര്‍ന്ന മുഖം എല്ലാവരുടെയും സ്വപ്നമാണ്. തിളക്കമാര്‍ന്ന മുഖചര്‍മ്മത്തിന് വേണ്ടി എത്ര ബുദ്ധിമുട്ടാനും എല്ലാവരും ഒരുക്കമാണ്. പക്ഷേ വെയില്‍, മലിനീകരണം, മാനസിക സമ്മര്‍ദ്ദങ്ങള്‍, ആരോഗ്യകരമല്ലാത്ത ഭക്ഷണരീതി ഇവയെല്ലാം ചര്‍മ്മത്തെ പ്രതികൂലമായി ബാധിക്കുന്നു. ഇവയെല്ലാം നമ്മുടെ പരിശ്രമങ്ങളുടെ ഫലപ്രാപ്തിയെ ബാധിക്കുന്നു.
ഫലമോ? കുരുവും ചുളിവുകളും നിറം മങ്ങിയതുമായ ചര്‍മ്മം ഉണ്ടാകുന്നു. നിങ്ങളുടെ മുഖം സുന്തരമാക്കാന്‍ നിങ്ങള്‍ക്ക് ഐസ് ക്യൂബുകള്‍ ഉപയോഗിക്കാം. മുഖത്ത് ഐസ് ഉപയോഗിച്ച് മസാജ് ചെയ്യുന്നതിലൂടെ ചര്‍മ്മത്തെ നല്ല രീതിയില്‍ നിങ്ങള്‍ക്ക് മാറ്റിയെടുക്കാവുന്നതാണ് ഐസ് കൊണ്ട് മുഖത്തു മസാജ് ചെയ്യുന്നതു നല്‍കുന്ന സൗന്ദര്യ, ആരോഗ്യ ഗുണങ്ങള്‍ ചെറുതല്ല. സാധാരണ ഐസ് മാത്രമല്ല, ചില പ്രത്യേക സൗന്ദര്യക്കൂട്ടുകള്‍ കൊണ്ട് തയ്യാറാക്കിയ ഐസ് ക്യൂബുകളും ഗുണം നല്‍കും.
ഐസ് മസ്സാജ്
കണ്ണുകള്‍ക്ക് മുകളിലോ സമീപ ഭാഗങ്ങളിലോ ഐസ് പുരട്ടുന്നത് ഒഴിവാക്കുക അല്ലെങ്കിൽ പ്രയോഗിക്കുമ്പോൾ മിതമായി മസാജ് ചെയ്യാന്‍ ശ്രദ്ധിക്കുക, പ്രത്യേകിച്ച് ഐസ് ക്യൂബുകളിൽ മറ്റ് ചേരുവകൾ അടങ്ങിയിട്ടുണ്ടെങ്കിൽ. ഐസ് മസാജ് ചെയ്യുന്നതിന് മുമ്പ് നിങ്ങളുടെ മുഖം ശുദ്ധമാണെന്ന് ഉറപ്പാക്കുക. മുഖത്തെ ഏതെങ്കിലും ഒരു ഭാഗത്ത് അമിതമായി മസാജ് ചെയ്യാന്‍ പാടില്ല. എല്ലായിടത്തും ഒരേ അളവില്‍ ലഭിയ്ക്കുന്ന രീതിയില്‍ ക്രമീകരിയ്ക്കുക.
രാവിലെയോ വൈകുന്നേരമോ ഐസ് മസാജ് ചെയ്യാൻ കഴിയും, എന്നാല്‍ ഒരു ദിവസം 10-15 മിനിറ്റിലധികം മസാജ് ചെയ്യുന്നത് ഒഴിവാക്കുക. നിങ്ങളുടെ മുഖത്തിന്റെ ഓരോ ഭാഗത്തും താടിയെല്ല്, താടി, കവിൾ, നെറ്റി, മൂക്ക് തുടങ്ങിയവയിൽ ശ്രദ്ധ കേന്ദ്രീകരിക്കുക.മുഖക്കുരു ഉള്ള സ്ഥലങ്ങളിൽ മസാജ് ചെയ്യാൻ കൂടുതൽ സമയം ഉപയോഗിക്കാം. നിങ്ങൾക്ക് മുഖക്കുരു ഉണ്ടെങ്കിൽ മൃദുവായ തുണി ഉപയോഗിച്ച് ഐസ് ക്യൂബുകൾ ഉപയോഗിക്കാൻ ശ്രമിക്കുക.ഐസ് മസാജ് ചെയ്യുന്നത് ഏതെങ്കിലും തരത്തിലുള്ള പ്രശ്നങ്ങള്‍ ഉണ്ടാക്കുന്നുവെങ്കില്‍ അത് തുടരാതിരിയ്ക്കാന്‍ ശ്രദ്ധിയ്ക്കുക. ഐസ് മസാജ്ശേഷം എല്ലായ്പ്പോഴും മോയ്‌സ്ചുറൈസർ ഉപയോഗിക്കുക.
ഗ്രീൻ ടീ ഐസ് ക്യൂബുകൾ
ഗ്രീൻ ടീ ചര്‍മത്തിന് ഗുണം ചെയ്യും എന്നത് കൂടാതെ ധാരാളം സൗന്ദര്യ ഗുണങ്ങളും ഇവയ്ക്കുണ്ട്. ചർമ്മത്തിന് പല രീതിയിലും ഗുണകരമായ വിവിധ തരത്തിലുള്ള സവിശേഷതകൾ നിറഞ്ഞതാണ് ഇവ. മുഖക്കുരു തടയുവാനും ചര്‍മത്തിന്റെ യുവത്വം കാത്തുസൂക്ഷിക്കുവാനും ഗ്രീൻ ടീ നിങ്ങളെ സഹായിക്കുന്നു.
ഗ്രീന്‍ ടീ കുടിയ്ക്കുന്നതും ചര്‍മത്തില്‍ പുരട്ടുന്നതും മികച്ച ഫലം നല്‍കും. കടുപ്പത്തില്‍ ഗ്രീൻ ടീ ഉണ്ടാക്കി ഐസ് ക്യൂബ് ട്രേയിലേക്ക് ഒഴിച്ച് ഫ്രീസുചെയ്യുക. ഗ്രീൻ ടീയിൽ ആൻറി ഓക്സിഡൻറും ആൻറി-ഇൻഫ്ലമേറ്ററി ഗുണങ്ങളും കൂടുതലായി അടങ്ങിയതിനാല്‍ ഇത് ചർമ്മത്തിന്റെ ആരോഗ്യം വർദ്ധിപ്പിക്കും.
മഞ്ഞൾ ഐസ് ക്യൂബ്
മഞ്ഞള്‍ പുരാതന കാലം മുതല്‍ തന്നെ സൗന്ദര്യവര്‍ദ്ധക വഴികളില്‍ മുന്‍പന്തിയില്‍ നില്‍ക്കുന്ന ഒന്നാണ്. സൗന്ദര്യം വര്‍ദ്ധിപ്പിയ്ക്കാന്‍ മാത്രമല്ല, പല സൗന്ദര്യ, ചര്‍മപ്രശ്‌നങ്ങള്‍ക്കുമുള്ള നല്ലൊരു മരുന്നു കൂടിയാണ് മഞ്ഞള്‍. ഇതിന് ആന്റിഫംഗല്‍, ആന്റിബാക്ടീരിയല്‍ ഗുണങ്ങളുണ്ട്.
ഇതുകൊണ്ടുതന്നെ മുഖക്കുരവടക്കമുള്ള പല ചര്‍മപ്രശ്‌നങ്ങള്‍ക്കും ഇത ഉത്തമ ഉപാധിയുമാണ്.ചര്‍മത്തിന് നിറം വര്‍ദ്ധിപ്പിയ്ക്കുമന്ന് അവകാശപ്പെട്ടിറങ്ങുന്ന മിക്കവാറും ക്രീമുകളില്‍ മഞ്ഞള്‍ പ്രധാന ചേരുവയാണ്. മഞ്ഞൾ വെള്ളത്തിൽ കലർത്തി ഐസ് ക്യൂബ് ട്രേയിൽ ഒഴിച്ച് ഫ്രീസ് ചെയ്യുക. മഞ്ഞൾ ഐസ് ക്യൂബുകൾക്ക് മുഖക്കുരു, ടാന്‍ എന്നിവ ഇല്ലാതാക്കാന്‍ സാധിയ്ക്കും. ഇതിന്‍റെ ആൻറി ബാക്ടീരിയൽ ഗുണങ്ങളാണ് ഇതിനു സഹായിക്കുന്നത്.
കുക്കുമ്പർ ഐസ് ക്യൂബുകൾ
ആരോഗ്യത്തിന് മാത്രമല്ല, സൗന്ദര്യത്തിനും ഏറെ ഗുണം നല്‍കുന്ന ഒന്നാണിത്. പല ചര്‍മ പ്രശ്‌നങ്ങള്‍ക്കും മരുന്നാണ്. ഇതിൽ ഉയർന്ന അളവിൽ നിറഞ്ഞിരിക്കുന്ന ആന്റി ഓക്‌സിഡന്റുകളും വിറ്റാമിൻ എ, ബി1, സി, ബയോട്ടിൻ, പൊട്ടാസ്യം തുടങ്ങിയ പോഷകങ്ങളെല്ലാം ചർമത്തിലെ ആരോഗ്യത്തെ പരിപോഷിപ്പിക്കുന്നതിന് സഹായിക്കും. ആൻറി ഇൻഫ്ളമേറ്ററി ഗുണങ്ങളും അടങ്ങിയിട്ടുള്ളതിനാൽ ചർമത്തിൽ ഉണ്ടാകുന്ന വീക്കത്തെ കുറച്ചു കൊണ്ട് എല്ലായ്പ്പോഴും ജലാംശം ഉള്ളതാക്കി നിലനിർത്താനും മുഖത്തിനു തിളക്കം നൽകാനുമെല്ലാം ഇത് സഹായിക്കുന്നു.
കുക്കുമ്പര്‍ പല രീതിയിലും ഉപയോഗിയ്ക്കാംകുക്കുമ്പർ അരച്ചെടുത്തതോ അല്ലെങ്കില്‍ ഗ്രേറ്റ് ചെയ്ത് എടുത്തോ ഇത് തയ്യാറാക്കാം. ഇതിലേയ്ക്ക് നാരങ്ങാ നീരും അല്പം വെള്ളവും ചേര്‍ത്ത് ഐസ് ക്യൂബ് തയ്യാറാക്കാം. ഇത് പതിവായി മുഖത്ത് മസാജ് ചെയ്യുക. വെള്ളരിയിൽ വിറ്റാമിൻ സിയും ആന്റിഓക്‌സിഡന്റ് പ്രോപ്പർട്ടികളും അടങ്ങിയിട്ടുണ്ട്, ഇത് വെയിലേല്‍ക്കുന്നതിനാല്‍ ചര്‍മത്തില്‍ ഉണ്ടാകുന്ന കേടുപാടുകൾ പരിഹരിക്കും.
കറ്റാർ വാഴ ഐസ് ക്യൂബുകൾ
പല തരത്തിലെ സൗന്ദര്യ ഗുണങ്ങളും കറ്റാര്‍ വാഴ ചര്‍മത്തിനു നല്‍കുന്നു. നിറം മുതല്‍ നല്ല ചര്‍മം വരെ ഇതില്‍ പെടുന്ന പ്രത്യേക കാര്യങ്ങളാണ്. ഇതിലെ വൈറ്റമിന്‍ ഇ ചര്‍മത്തിന് ഏറെ സഹായകമാണ്. തിളക്കമുള്ള ചര്‍മവും മാര്‍ദവമുള്ള ചര്‍മവുമെല്ലാം മറ്റു ഗുണങ്ങളാണ്.കറ്റാർ വാഴ ജെൽ വേർതിരിച്ചെടുത്ത് വെള്ളത്തിൽ കലർത്തി ഐസ് ട്രെയില്‍ ഒഴിച്ച് ക്യൂബുകളാക്കി മാറ്റാം. ഇതില്‍ ധാരാളം ആൻറി ഓക്സിഡൻറുകൾ, എൻസൈമുകൾ, വിറ്റാമിനുകൾ എന്നിവ അടങ്ങിയിട്ടുണ്ട്. അതിനാല്‍ മുഖ ചര്‍മത്തെ കൂടുതല്‍ മനോഹരമാക്കാന്‍ ഇത് വഴി സഹായിക്കും.
