കുന്നംകുളം : തൃശ്ശൂരിലെ സ്വകാര്യ ആശുപത്രിയിൽ ഭാര്യയെ പ്രസവത്തിന് പ്രവേശിപ്പിച്ച സമയത്ത് പരിചരിക്കാൻ നിന്ന യുവതിയെ പീഡിപ്പിച്ചയാളെ 12 വർഷം തടവിനും 1.10 ലക്ഷം രൂപ പിഴയടയ്ക്കാനും കുന്നംകുളം അതിവേഗ പ്രത്യേക പോക്സോ കോടതി ശിക്ഷിച്ചു.
സ്വര്‍ണ കച്ചവടക്കാരനായ ചെറുതുരുത്തി പള്ളം ആറ്റൂര്‍ കണ്ടംപുള്ളി വീട്ടില്‍ സുരേഷി (45) നെയാണ് കുന്നംകുളം പോക്സോ കോടതി ജഡ്ജി എസ് ലിഷ ശിക്ഷിച്ചത്.
പ്രതിയോട് പോക്സോ കോടതിയില്‍ വിചാരണ നേരിടണമെന്ന് ഉത്തരവിട്ടിരുന്നു. തുടര്‍ന്നുള്ള വിചാരണയ്ക്കു ശേഷമാണ് പ്രതിയെ ശിക്ഷിച്ചത്.
2008 ല്‍ തൃശൂരിലെ സ്വകാര്യ ആശുപത്രിയില്‍ ഭാര്യയെ പ്രസവ ചികിത്സയ്ക്കായി അഡ്മിറ്റ് ചെയ്ത സമയത്ത് പരിചരിക്കാന്‍ നിന്നിരുന്ന ബന്ധുവിനെ, ഭാര്യയെ ലേബര്‍ റൂമില്‍ ചികിത്സയ്ക്കായി കൊണ്ടുപോയ സമയം ആശുപത്രി റൂമില്‍വച്ചും 2012 കോയമ്പത്തൂരിലുള്ള വീട്ടില്‍വച്ചും 2019 ഡിസംബറില്‍ പള്ളത്തുള്ള പ്രതിയുടെ വീട്ടില്‍വച്ചും ഭാര്യയുടെ ബന്ധുവിനെ ബലാത്സംഗം ചെയ്തിരുന്നു. ആദ്യ സംഭവം മൊബൈല്‍ ഫോണില്‍ പകര്‍ത്തിയിട്ടുണ്ടെന്നും പുറത്തു പറഞ്ഞാല്‍ വീട്ടുകാര്‍ക്കും നാട്ടുകാര്‍ക്കിടയിലും പ്രചരിപ്പിക്കുമെന്ന് ഭീഷണിപ്പെടുത്തിയാണ് പ്രതി ഭാര്യായുടെ ബന്ധുവിനെ ബലാത്സംഗത്തിന് ഇരയാക്കിയിരുന്നത്. എന്നാൽ സംഭവം അറിയാനിടയായ ഭാര്യ പ്രതിയായ ഭര്‍ത്താവിനെതിരെ കുടുംബ കോടതിയില്‍ കേസ് കൊടുത്തപ്പോള്‍ അതിജീവിതയെയും ഭാര്യയെയും കൊല്ലുമെന്ന് ഭീഷണിപ്പെടുത്തി.
തുടര്‍ന്ന് 2021 ജനുവരിയില്‍ എരുമപ്പെട്ടി പൊലീസില്‍ പരാതി ബോധിപ്പിച്ചതിനെ തുടര്‍ന്നാണ് പ്രതിക്കെതിരെ കേസ് രജിസ്റ്റര്‍ ചെയ്ത് അന്വേഷണം നടത്തി പ്രതിയായ സുരേഷിനെതിരെ കുറ്റപത്രം സമര്‍പ്പിച്ചത്.
